بسم الله
ما ادري صراحة من فين أبدا كلامي ولا حتى كيف حأصيغ عباراتي . اللي حابه اتكلم فيه عن شي انا عملته ادري انو مو كويس
وهو انو اكتم نفسي طول اليوم يعني اي حدث مو كويس يصير لي او اي امر يضايقني
امسك نفسي واحاول قد ما أقدر ما أبين قدام اي احد اي شي وعادي اضحك واسولف معاهم يمكن الناس اللي مرا يحبوني راح يلاحظو علي اني متضايقة وانا طبيعي راح احس انهم عارفين علشان كذا اتجنب اكلمهم واشغل نفسي بأي شي يكون بعيد عن نظرهم
وما ان اختلي بنفسي ويحين وقت نومتي تبدأ دموعي سيلان وماتوقف ابدا , انا عجبني هالشيء لانو ما ابغى أأذي احد بدموعي وببكائي , وعادي جدا امسك المواقف التي تصير لي طوال اليوم وابدأ احاسب نفسي عليها وأنا ليش سويت كذا وليش ماعملت كذا
وفي ثانيه اقول لا ي بنت انتي انسانه مافي مثلك وانتي وانتي يعني أعزز لنفسي وأرجع مرا ثانيه أحاسبها ..
انا ما اقول هذا الشي حتى اشجع احد يعمل زيي لا ابدا ترا جد هذا الشي مراا متعب ومرا مو كويس انك تنامي وانتي شاحنه نفسك بكمات من الدموع والافكار السلبيه عن نفسك , يعني بديهي بعد نومه زي كذا تتوقعي كيف ممكن حتصحي حتأثري على نفسك
من كل الجوانب جماليا ونفسيا واجتماعيا يعني كله
اول شي حتصحي وعيونك مفقعة ومنتفخة وحالتك حاله وغير الهالات التي حتظهر فيك وهيا ابدأي أتنكدي زيادة وبعدها حتصيحي وتنيحي ايش اللي حيبعدها ومنظرها ابدا مو حلو , وغير كذا حتكوني منفسه من اول ما تصحي وتكوني معصبه ومزاجك عكر
واللي يبغى وناسته حيحاول يتجنبك وما يتكلم معاك ولا حتى يعطيك وجه هههههه ( كلا يشتري راحة دماغه )
وهذا اقتباس من قوقل عن الاضرار اللي تحصل /
• الصداع
• القلق والتوتر وعدم القدرة على النوم
• زيادة ضربات القلب
• القولون العصبي
ترا فعلا انا مجربه هذا الاسبوع كله ماسكة نفسي وخلاص لمن جيت انام جلدت نفسي جلد الله وكيلكم كيف , وغير كذا جلست يومين
مزاجي متعكر ومو راضي يزبط , لكن خلاص هذي اخر مرا اعملها مرا شيء متعب ...
فعلشان كذا لاتكتمو بقلوبكم اي شي وعيشو حياتكم بعفويه وببساطة وقد ماتقدرو ابتعدو عن الافكار السلبيه او الانقاص من ذاتكم
وانبسطو بالحياه ولا تخلو عمركم يمضي سدى حطو لكم اهداف مارسو حياتكم بشكل طبيعي حتى ماتندمو بعدين وتقولو ليش
ما استمتعت في هذاك الوقت , لا تخلو الاحزان تسيطر على حياتكم , واخيرا حبو ذاتكم ودلعوها واعطوها كل ماتستحق واكثر *
لاااااا للبكاء قبل النوم
خارج النص /
لأول مرا اكتب كلام زي كذا واطلع اللي بقلبي خارج اسوار دفاتري وجوالي
فأتمنى من كل قلبي انو هالفضفضة تفيد ولو بكلمة .. خذو الايجابي واتركو السلبي ...
حاسه فيك =( انا انسانه اكتم بنفسي واكره ابكي قدام احد. لكني ماابكي لما اجي انام ,لا اخلي كل شي يتراكم ايام وبعدين انفجر, وصياااااح واصحى اليوم الثاني وعيوني منفخه وراسي مصدع *_* بس الحمدالله
ردحذفلقيت الكتابه تهديني وتريحني كل ماحسيت اني متضايقه اخذت ورقه وقلم وطلعت كل الي بصدري .
لاتوقفين عن التدوين اسلوبك جميل =)
=)